കേരളത്തിന്റെ ഫുട്ബോൾ ആവേശവും കാൽപ്പന്തുകളിയുമായി മലയാളികൾക്കുള്ള ആഴമേറിയ ബന്ധവും അടയാളപ്പെടുത്തുന്ന ZEE5 ഒറിജിനൽ മലയാളം സ്പോർട്സ് ഡോക്യുമെന്ററി സീരീസ് ‘പന്തടിക്കാം’ ഒക്ടോബർ 1 മുതൽ സ്ട്രീമിങ് ആരംഭിക്കും. അഞ്ച് എപ്പിസോഡുകളുള്ള സീരീസിന് പത്മഭൂഷൺ മമ്മൂട്ടിയാണ് വിവരണം നൽകുന്നത്. മലയാളം ZEE5ൽ എക്സ്ക്ലൂസീവായാണ് സീരീസ് പ്രേക്ഷകരിലേക്കെത്തുന്നത്.
ZEE5ന്റെ ആദ്യ മലയാളം സ്പോർട്സ് ഡോക്യുമെന്ററി എന്ന പ്രത്യേകതയോടെയാണ് ‘പന്തടിക്കാം’ എത്തുന്നത്. ഏകദേശം 20 മിനിറ്റ് വീതമുള്ള അഞ്ച് എപ്പിസോഡുകളിലൂടെ കേരളത്തിന്റെ ഫുട്ബോൾ ചരിത്രവും പാരമ്പര്യവും ആരാധനാസംസ്കാരവും സീരീസ് അവതരിപ്പിക്കുന്നു. ആദ്യകാല ക്ലബ് ഫുട്ബോളിൽ നിന്ന് സന്തോഷ് ട്രോഫിയുടെ സുവർണകാലഘട്ടങ്ങളിലേക്കും അവിടെനിന്ന് ഇന്നത്തെ പ്രൊഫഷണൽ ഫുട്ബോളിലേക്കുമുള്ള യാത്രയാണ് ഇതിന്റെ പ്രധാന പ്രമേയം.
കേരളത്തിലെ തെരുവുകളിലും പ്രാദേശിക മൈതാനങ്ങളിലും നടക്കുന്ന മത്സരങ്ങൾ മുതൽ അന്താരാഷ്ട്ര ഫുട്ബോളിന്റെ അർധരാത്രി സ്ക്രീനിങ്ങുകൾ വരെ ‘പന്തടിക്കാം’ രേഖപ്പെടുത്തുന്നു. ബ്രസീലിനും അർജന്റീനയ്ക്കുമുള്ള മലയാളികളുടെ ആരാധന, വമ്പൻ ഫ്ലക്സ് ബോർഡുകൾ, ഫുട്ബോൾ നിറങ്ങളണിയുന്ന ഓട്ടോറിക്ഷകൾ, ആരാധകർക്കിടയിലെ ചർച്ചകളും മത്സരാവേശവും, ലോകത്തിന്റെ വിവിധ ഭാഗങ്ങളിലേക്ക് മത്സരം കാണാൻ യാത്ര ചെയ്യുന്ന ആരാധകരുടെ അനുഭവങ്ങളും സീരീസിന്റെ ഭാഗമാകും.
പ്രായത്തിനും തൊഴിലിനും പ്രദേശത്തിനുമപ്പുറം മലയാളികളെ ഒരുമിപ്പിക്കുന്ന ഒരു സാംസ്കാരിക അനുഭവമായി ഫുട്ബോൾ എങ്ങനെ മാറിയെന്ന അന്വേഷണവും ഡോക്യുമെന്ററിയുടെ ഭാഗമാണ്. ഇന്ത്യയുടെ ആദ്യ നാഷണൽ ആംപ്യൂട്ടി ഫുട്ബോൾ ടീമിന്റെ ക്യാപ്റ്റനായ വൈശാഖ് എസ്.ആറിന്റെ ജീവിതയാത്രയും സീരീസിൽ അവതരിപ്പിക്കുന്നതായി ZEE5 അറിയിച്ചു. പ്രതിസന്ധികളെ മറികടന്ന് ഫുട്ബോളിനോടുള്ള അഭിനിവേശം പിന്തുടർന്ന അദ്ദേഹത്തിന്റെ കഥയും ‘പന്തടിക്കാം’ മുന്നോട്ടുവയ്ക്കുന്ന പ്രമേയത്തിന്റെ പ്രധാന ഭാഗമാണ്.
കേരളത്തിൽ ഫുട്ബോൾ ഒരു കായികവിനോദം മാത്രമല്ലെന്നും ആളുകളെ ഒരുമിപ്പിക്കുന്ന വികാരം കൂടിയാണെന്നും ഡോക്യുമെന്ററിയെക്കുറിച്ച് മമ്മൂട്ടി പറഞ്ഞു. തെരുവുകളിലും പ്രാദേശിക മൈതാനങ്ങളിലും നടക്കുന്ന കളികൾ മുതൽ അന്താരാഷ്ട്ര മത്സരങ്ങൾ കാണാനുള്ള ആവേശം വരെ മലയാളികൾക്കുള്ള ഫുട്ബോൾ സ്നേഹം തന്നെ ഏറെ ആകർഷിച്ചിട്ടുണ്ടെന്നും അദ്ദേഹം വ്യക്തമാക്കി. കേരളവും ഫുട്ബോളും തമ്മിലുള്ള സവിശേഷ ബന്ധത്തിന്റെ കഥകളും ആഘോഷങ്ങളും ഓർമകളുമാണ് ‘പന്തടിക്കാം’ പ്രേക്ഷകരിലേക്ക് എത്തിക്കുന്നതെന്നും ഈ ഡോക്യുമെന്ററിയുടെ ഭാഗമാകാൻ കഴിഞ്ഞതിൽ സന്തോഷമുണ്ടെന്നും മമ്മൂട്ടി പറഞ്ഞു.
മലയാളി പ്രേക്ഷകരുടെ താൽപര്യങ്ങളും സംസ്കാരവും സ്വത്വവും പ്രതിഫലിപ്പിക്കുന്ന കഥകൾ അവതരിപ്പിക്കുകയാണ് ലക്ഷ്യമെന്ന് ZEE5 തമിഴ്, തെലുങ്ക്, മലയാളം ബിസിനസ് ഹെഡ് ലോയ്ഡ് സി. സേവ്യർ പറഞ്ഞു. കേരളത്തിന്റെ ഏറ്റവും വലിയ ആവേശങ്ങളിലൊന്നായ ഫുട്ബോളിനെയും മമ്മൂട്ടിയുടെ ശബ്ദത്തെയും ഒരുമിപ്പിക്കുന്ന സീരീസാണ് ‘പന്തടിക്കാം’ എന്നും അദ്ദേഹം വ്യക്തമാക്കി.
⚽ Kerala’s football story, in Mammootty’s voice!
ZEE5 Original #Panthadikkam explores Kerala’s football history, passion and fan culture across five episodes, narrated by Mammootty.
📺 Streaming exclusively on Malayalam ZEE5 from October 1.#Mammootty #ZEE5 pic.twitter.com/GV9UKIaQnL— CinemaCafe™ Media (@cinemacafemedia) September 30, 2026
സ്റ്റോറീസ് സോഷ്യലിന്റെ ബാനറിൽ ഡോ. സംഗീത ജനചന്ദ്രൻ നിർമ്മിക്കുന്ന സീരീസ് സംവിധാനം ചെയ്തിരിക്കുന്നത് നിക്സ് ലോപ്പസ് ആണ്. പശ്ചാത്തല സംഗീതവും അദ്ദേഹം തന്നെയാണ് ഒരുക്കുന്നത്. ഗീതാർത്ഥ എ.ആർ. രചനയും ജോ ക്രിസ്റ്റോ സേവ്യർ ഛായാഗ്രഹണവും സജീഷ് സ്വാമിനാഥൻ എഡിറ്റിങ്ങും നിർവഹിക്കുന്നു.
കേരളത്തിന്റെ ഫുട്ബോൾ ചരിത്രത്തിനൊപ്പം ആരാധകരുടെ വ്യക്തിപരമായ അനുഭവങ്ങളും ആഘോഷങ്ങളും തലമുറകളെ ബന്ധിപ്പിക്കുന്ന ഫുട്ബോൾ സംസ്കാരവും സിനിമാറ്റിക് അവതരണത്തിലൂടെ പകർത്തുന്ന ‘പന്തടിക്കാം’ ഒക്ടോബർ 1 മുതൽ മലയാളം ZEE5ൽ എക്സ്ക്ലൂസീവായി സ്ട്രീം ചെയ്യും.
അണിയറ പ്രവർത്തകർ: വിവരണം – മമ്മൂട്ടി; നിർമ്മാണം – ഡോ. സംഗീത ജനചന്ദ്രൻ; ബാനർ – സ്റ്റോറീസ് സോഷ്യൽ; സംവിധാനം, പശ്ചാത്തല സംഗീതം – നിക്സ് ലോപ്പസ്; രചന – ഗീതാർത്ഥ എ.ആർ.; ഛായാഗ്രഹണം – ജോ ക്രിസ്റ്റോ സേവ്യർ; എഡിറ്റിങ് – സജീഷ് സ്വാമിനാഥൻ; സ്ട്രീമിങ് – മലയാളം ZEE5.
Mammootty Narrates Kerala’s Football Story in ZEE5 Original Panthadikkam; Streaming from October 1
Mammootty narrates Panthadikkam, ZEE5’s first Malayalam sports documentary series exploring Kerala’s football history, culture and fandom. The five-episode series streams from October 1.
About Author
