രജനികാന്തിനെ നായകനാക്കി നെൽസൺ ദിലീപ്കുമാർ സംവിധാനം ചെയ്യുന്ന ‘ജയിലർ 2’ കേരളത്തിൽ അഡ്വാൻസ് ബുക്കിംഗ് ആരംഭിച്ചതിന് പിന്നാലെ വമ്പൻ മുന്നേറ്റം. ബുക്കിംഗ് തുറന്ന് ആദ്യ ഒരു മണിക്കൂറിനുള്ളിൽ 1 കോടി 61 ലക്ഷം രൂപയിലധികം പ്രീസെയിലും ഒരു ലക്ഷത്തിലധികം ടിക്കറ്റ് വിൽപ്പനയും നേടിയതായി ചിത്രത്തിന്റെ വിതരണക്കാർ അറിയിച്ചു. ഒക്ടോബർ 15ന് ലോകമെമ്പാടുമുള്ള തിയറ്ററുകളിലെത്തുന്ന ചിത്രം കേരളത്തിൽ ഗോകുലം ഗോപാലന്റെ ശ്രീ ഗോകുലം മൂവീസ് ആണ് വിതരണം ചെയ്യുന്നത്.
കേരളത്തിലെ സിനിമാ അഡ്വാൻസ് ബുക്കിംഗിൽ ശ്രദ്ധേയമായ നേട്ടമാണ് ‘ജയിലർ 2’ സ്വന്തമാക്കിയിരിക്കുന്നതെന്നാണ് വിതരണക്കാരുടെ അവകാശവാദം. ആദ്യ മണിക്കൂറുകളിൽ ബുക്ക് മൈ ഷോയിൽ മണിക്കൂറിൽ 40,000ത്തിലധികം ടിക്കറ്റുകൾ വിറ്റഴിക്കുന്ന നിരക്കിലാണ് ബുക്കിംഗ് പുരോഗമിച്ചത്. ഡിസ്ട്രിക്റ്റ് ബൈ സൊമാറ്റോ ആപ്പിൽ മാത്രം ആദ്യ മണിക്കൂറിൽ 12,000ത്തിലധികം ടിക്കറ്റുകൾ വിറ്റതായും റിപ്പോർട്ടുണ്ട്.
ഡിസ്ട്രിക്റ്റ് ആപ്പിന്റെ കേരളത്തിലെ പ്രീബുക്കിംഗ് ചരിത്രത്തിൽ ഒരു സിനിമയ്ക്ക് ആദ്യ മണിക്കൂറിൽ ഇത്രയധികം ടിക്കറ്റുകൾ വിറ്റുപോകുന്നത് ആദ്യമായാണെന്നാണ് അണിയറപ്രവർത്തകർ വ്യക്തമാക്കുന്നത്. ബുക്ക് മൈ ഷോ, ഡിസ്ട്രിക്റ്റ് ബൈ സൊമാറ്റോ, ടിക്കറ്റ് ന്യൂ എന്നീ പ്ലാറ്റ്‌ഫോമുകളിലൂടെയും തിയറ്റർ കൗണ്ടറുകളിലൂടെയുമുള്ള വിൽപ്പന ഉൾപ്പെടുത്തിയാണ് ആദ്യ മണിക്കൂറിലെ ഒരു ലക്ഷത്തിലധികം ടിക്കറ്റുകളുടെ കണക്ക്.
ബുക്ക് മൈ ഷോയിൽ ട്രെൻഡിങ്ങിൽ തുടരുന്ന ചിത്രത്തിന് ഡിസ്ട്രിക്റ്റ് ബൈ സൊമാറ്റോയിൽ ‘Most Hyped’ ബാഡ്ജും ലഭിച്ചതായി വിതരണക്കാർ അറിയിച്ചു. കേരളത്തിലെ വിവിധ കേന്ദ്രങ്ങളിൽ ആദ്യദിന ഷോകൾ അതിവേഗം നിറയുന്നതോടെ അധിക പ്രദർശനങ്ങൾ ഉൾപ്പെടുത്താനുള്ള ഒരുക്കങ്ങളും ആരംഭിച്ചിട്ടുണ്ട്.
കൊച്ചി, തിരുവനന്തപുരം, കോഴിക്കോട്, തൃശൂർ, കണ്ണൂർ, കോട്ടയം തുടങ്ങിയ പ്രധാന നഗരങ്ങളിലെല്ലാം ചിത്രത്തിന് മികച്ച ബുക്കിംഗ് പ്രതികരണമാണ് ലഭിക്കുന്നതെന്നാണ് വിതരണക്കാർ വ്യക്തമാക്കുന്നത്. ചില തിയറ്ററുകളിൽ റിലീസ് ദിനത്തിലെ മുഴുവൻ ഷോകളും ബുക്ക് ചെയ്തുകഴിഞ്ഞ സാഹചര്യത്തിൽ കൂടുതൽ ഷോകൾ അനുവദിക്കാനുള്ള ശ്രമങ്ങളും പുരോഗമിക്കുകയാണ്. പ്രധാന കേന്ദ്രങ്ങളിൽ മാരത്തൺ പ്രദർശനങ്ങൾ സംഘടിപ്പിക്കാനുള്ള പദ്ധതികളുമുണ്ട്.
കേരളത്തിലെ ഏകദേശം 800 സ്ക്രീനുകളിലാണ് ‘ജയിലർ 2’ റിലീസ് ചെയ്യാൻ പദ്ധതിയിടുന്നത്. സംസ്ഥാനത്തെ ഏറ്റവും വലിയ റിലീസുകളിലൊന്നായി ചിത്രം മാറുമെന്നാണ് വിതരണക്കാരുടെ പ്രതീക്ഷ. ഡ്രീം ബിഗ് ഫിലിംസാണ് കേരളത്തിലെ ഡിസ്ട്രിബ്യൂഷൻ പാർട്ണർ. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമ്മിക്കുന്നത്.
കേരളത്തിലെ ബുക്കിംഗ് ആവേശത്തിന് പിന്നിൽ മോഹൻലാലിന്റെ സാന്നിധ്യവും നിർണായക ഘടകമാണെന്നാണ് വിലയിരുത്തൽ. ആദ്യ ‘ജയിലറി’ൽ അതിഥി വേഷത്തിലെത്തി ശ്രദ്ധ നേടിയ മോഹൻലാൽ രണ്ടാം ഭാഗത്തിലും എത്തുന്നുണ്ട്. ട്രെയ്‌ലറിൽ താരത്തെ മാസ് ലുക്കിൽ അവതരിപ്പിച്ചതോടെ മലയാളി പ്രേക്ഷകർക്കിടയിൽ ചിത്രത്തെക്കുറിച്ചുള്ള പ്രതീക്ഷകൾ വർധിച്ചിരുന്നു.
രജനികാന്തും മോഹൻലാലും വീണ്ടും ഒരുമിക്കുന്ന സിനിമയെ ബിഗ് സ്ക്രീനിൽ കാണാനുള്ള ആരാധകരുടെ ആവേശം അഡ്വാൻസ് ബുക്കിംഗിലും പ്രതിഫലിക്കുന്നുവെന്നാണ് വിതരണക്കാരുടെ വിലയിരുത്തൽ. ആദ്യ ഭാഗത്തിലെ മറ്റൊരു ശ്രദ്ധേയ സാന്നിധ്യമായ ശിവ രാജ്കുമാറും രണ്ടാം ഭാഗത്തിൽ തിരിച്ചെത്തുന്നുണ്ട്.
ബ്ലോക്ക്ബസ്റ്റർ വിജയമായ ‘ജയിലറി’ന് ശേഷം മുത്തുവേൽ പാണ്ഡ്യൻ എന്ന കഥാപാത്രമായാണ് രജനികാന്ത് വീണ്ടും എത്തുന്നത്. സുരാജ് വെഞ്ഞാറമൂട്, എസ്.ജെ. സൂര്യ, വിദ്യ ബാലൻ, മിഥുൻ ചക്രവർത്തി, യോഗി ബാബു, ഹക്കീം ഷാജഹാൻ തുടങ്ങിയവരും ചിത്രത്തിന്റെ താരനിരയിലുണ്ട്.
നെൽസൺ ദിലീപ്കുമാറിന്റെ മാസ് അവതരണത്തിനൊപ്പം ആക്ഷൻ രംഗങ്ങൾക്കും ബ്ലാക്ക് ഹ്യൂമറിനും പ്രാധാന്യം നൽകുന്ന ചിത്രമായിരിക്കുമെന്ന സൂചനയാണ് നേരത്തെ പുറത്തിറങ്ങിയ ട്രെയ്‌ലർ നൽകിയത്. അനിരുദ്ധ് രവിചന്ദറിന്റെ സംഗീതവും പശ്ചാത്തലസംഗീതവും ചിത്രത്തിന്റെ പ്രധാന ആകർഷണങ്ങളിലൊന്നാണ്.
🔥 #Jailer2 storms Kerala advance booking!
Rajinikanth’s film records ₹1.61 crore+ presales and 1 lakh+ tickets sold in the first hour, according to distributors.
🎬 October 15 | 6 AM first shows 📍 Sree Gokulam Movies
#Rajinikanth #Mohanlal https://t.co/oYyxiEJW5m— CinemaCafe™ Media (@cinemacafemedia) October 11, 2026
ഒക്ടോബർ 15ന് പുലർച്ചെ 6 മണി മുതലാണ് കേരളത്തിൽ ‘ജയിലർ 2’ പ്രദർശനം ആരംഭിക്കുന്നത്. റിലീസ് ദിനം അടുക്കുന്നതിനൊപ്പം കൂടുതൽ തിയറ്ററുകളിലും ഷോകൾ ഉൾപ്പെടുത്താനുള്ള ഒരുക്കങ്ങൾ പുരോഗമിക്കുകയാണ്. ആദ്യ മണിക്കൂറിലെ പ്രീസെയിൽ നേട്ടത്തിന് പിന്നാലെ കേരളത്തിലെ ഓപ്പണിങ് ദിന കളക്ഷനിലും വലിയ മുന്നേറ്റമുണ്ടാകുമെന്ന പ്രതീക്ഷയിലാണ് വിതരണക്കാർ.
അണിയറ പ്രവർത്തകർ: രചന, സംവിധാനം – നെൽസൺ ദിലീപ്കുമാർ; നിർമ്മാണം – കലാനിധി മാരൻ; ബാനർ – സൺ പിക്ചേഴ്സ്; ഛായാഗ്രഹണം – വിജയ് കാർത്തിക് കണ്ണൻ; എഡിറ്റിങ് – ആർ. നിർമ്മൽ; സംഗീതം – അനിരുദ്ധ് രവിചന്ദർ; പ്രൊഡക്ഷൻ ഡിസൈൻ – ഡോ. കെ. കിരൺ; ആക്ഷൻ – ചേതൻ ഡി’സൂസ; കോസ്റ്റ്യൂം ഡിസൈൻ – പല്ലവി സിംഗ്, മുതുൽ ഹഫീസ്; സൗണ്ട് മിക്സ് – സുരേൻ ജി.; സൗണ്ട് ഡിസൈൻ – സുരേൻ ജി., എസ്. അളഗിയകൂത്തൻ; കളറിസ്റ്റ് – ആൻഡ്രിയാസ് ബ്രൂക്കൽ; DI ലാബ് – അന്നപൂർണ സ്റ്റുഡിയോസ്; VFX പ്രൊഡ്യൂസർ – സന്തോഷ് രാജു; മേക്കപ്പ് – പട്ടണം റഷീദ്, സി. ഹരിനാഥ്; സ്റ്റിൽസ് – വി. സിത്തിരസു; പബ്ലിസിറ്റി ഡിസൈൻ – കബിലൻ ചെല്ലയ്യ; പ്രൊഡക്ഷൻ കൺട്രോളർമാർ – ഡി. രമേഷ് കുച്ചിരായർ, ആർ.എസ്. സുരേഷ് മണിയൻ; എക്സിക്യൂട്ടീവ് പ്രൊഡ്യൂസർ – സുനിൽ റെഡ്ഡി; കേരള വിതരണം – ശ്രീ ഗോകുലം മൂവീസ്; കേരള ഡിസ്ട്രിബ്യൂഷൻ പാർട്ണർ – ഡ്രീം ബിഗ് ഫിലിംസ്; ❤️ പി.ആർ.ഒ – ശബരി.
Jailer 2 Kerala Advance Booking: ₹1.61 Crore Presales, 1 Lakh+ Tickets Sold in First Hour
Rajinikanth’s Jailer 2 reportedly records ₹1.61 crore in Kerala presales and over 1 lakh tickets sold in the first hour, according to distributors. The film releases worldwide on October 15.
About Author
