മലയാള സിനിമയ്ക്ക് പുതിയ ‘ഗെയിം’; ത്രസിപ്പിക്കുന്ന ആദ്യ പ്രതികരണങ്ങളുമായി ദുൽഖറിന്റെ ‘ഐ ആം ഗെയിം’

ദുൽഖർ സൽമാന്റെ വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്നാണ് ചിത്രം നിർമ്മിച്ചിരിക്കുന്നത്. സജീർ ബാബ, ഇസ്മായിൽ അബൂബക്കർ, ബിലാൽ മൊയ്‌ദു എന്നിവർ ചേർന്നാണ് തിരക്കഥ ഒരുക്കിയത്. സജീർ ബാബ, ആദർശ് സുകുമാരൻ, ഷബാസ് റഷീദ് എന്നിവരാണ് സംഭാഷണങ്ങൾ രചിച്ചിരിക്കുന്നത്.

‘ഡാൻ’ എന്ന കഥാപാത്രമായാണ് ദുൽഖർ ചിത്രത്തിലെത്തുന്നത്. സ്റ്റൈലിഷ് അവതരണത്തിനൊപ്പം ആക്ഷൻ, പ്രണയം, വൈകാരിക മുഹൂർത്തങ്ങൾ എന്നിവയിലൂടെ കഥാപാത്രത്തിന്റെ വ്യത്യസ്ത തലങ്ങൾ അവതരിപ്പിക്കുന്ന ദുൽഖറിന്റെ പ്രകടനത്തിന് ആദ്യ ഷോകൾ മുതൽ മികച്ച പ്രതികരണമാണ് ലഭിക്കുന്നത്. പ്രത്യേകിച്ച് മാസ്, ആക്ഷൻ രംഗങ്ങളിലെ ദുൽഖറിന്റെ പ്രകടനം ആരാധകരെ ആവേശത്തിലാക്കുന്നതായാണ് പ്രേക്ഷക പ്രതികരണങ്ങൾ.

ഫാന്റസിയുടെ ലോകത്തേക്ക് ആക്ഷനും ത്രില്ലർ ഘടകങ്ങളും ചേർത്താണ് നഹാസ് ഹിദായത്ത് സിനിമ ഒരുക്കിയിരിക്കുന്നത്. ആദ്യാവസാനം സസ്പെൻസും ആവേശവും നിലനിർത്തുന്ന കഥപറച്ചിലിനൊപ്പം വലിയ സ്ക്രീനിൽ ആഘോഷിക്കാവുന്ന നിരവധി രംഗങ്ങളും ചിത്രത്തിലുണ്ടെന്നാണ് ആദ്യ പ്രതികരണങ്ങൾ. ഇന്റർവെൽ ബ്ലോക്കും ക്ലൈമാക്സും സിനിമയുടെ പ്രധാന ഹൈലൈറ്റുകളായി പ്രേക്ഷകർ ചൂണ്ടിക്കാട്ടുന്നുണ്ട്.

ചിത്രത്തിന്റെ സാങ്കേതിക മികവിനും മികച്ച അഭിപ്രായമാണ് ലഭിക്കുന്നത്. ജേക്സ് ബിജോയ് ഒരുക്കിയ ഗാനങ്ങളും പശ്ചാത്തല സംഗീതവും ആക്ഷൻ രംഗങ്ങളുടെ തീവ്രത വർധിപ്പിക്കുമ്പോൾ ജിംഷി ഖാലിദിന്റെ ഛായാഗ്രഹണം ഫാന്റസി ലോകത്തിന് ദൃശ്യഭംഗി നൽകുന്നു. അൻപറിവ് മാസ്റ്റേഴ്സ് ഒരുക്കിയ ആക്ഷൻ രംഗങ്ങളും സിനിമയുടെ തിയറ്റർ അനുഭവത്തിന് കരുത്തേകുന്നു.

ദുൽഖറിനൊപ്പം ആന്റണി വർഗീസ്, മിഷ്കിൻ, കതിർ, കായദു ലോഹർ, പാർത്ഥ് തിവാരി, സംയുക്ത വിശ്വനാഥൻ, വിനയ് ഫോർട്ട് തുടങ്ങിയവരും നിർണായക കഥാപാത്രങ്ങളെ അവതരിപ്പിക്കുന്നു. താരങ്ങളുടെ പ്രകടനത്തിനൊപ്പം നഹാസ് ഹിദായത്തിന്റെ മേക്കിങ്ങും ചിത്രത്തിന്റെ പ്രധാന ആകർഷണങ്ങളിലൊന്നായാണ് ആദ്യ പ്രതികരണങ്ങളിൽ വിലയിരുത്തപ്പെടുന്നത്.

റിലീസിന് മുമ്പുതന്നെ അഡ്വാൻസ് ബുക്കിങ്ങിലൂടെ ശ്രദ്ധ നേടിയ ചിത്രം റിലീസ് ദിനത്തിലും ബുക്ക് മൈ ഷോ ട്രെൻഡിങ്ങിൽ മുന്നേറുന്നതായാണ് അണിയറപ്രവർത്തകർ അറിയിക്കുന്നത്. കേരളത്തിലും ആഗോള വിപണിയിലും ദുൽഖർ സൽമാന്റെ കരിയറിലെ മികച്ച ഓപ്പണിങ്ങുകളിലൊന്ന് ചിത്രം നേടുമെന്ന പ്രതീക്ഷയിലാണ് അണിയറപ്രവർത്തകർ.

ചിത്രത്തിന്റെ മ്യൂസിക് റൈറ്റ്സ് 12.5 കോടി രൂപയ്ക്ക് സീ മ്യൂസിക് സ്വന്തമാക്കിയതായാണ് റിപ്പോർട്ട്. ‘ഹൈ സ്റ്റേക്ക്സ്’, ‘മഴവില്ലായേ’, ‘ലൂസർ’ തുടങ്ങിയ ഗാനങ്ങൾ റിലീസിന് മുമ്പുതന്നെ ശ്രദ്ധ നേടിയിരുന്നു.

ദുൽഖർ സൽമാന്റെ 40-ാമത്തെ ചിത്രം കൂടിയായ ‘ഐ ആം ഗെയിം’ മലയാളത്തിനൊപ്പം തമിഴ്, തെലുങ്ക്, ഹിന്ദി, കന്നഡ ഭാഷകളിലും പാൻ ഇന്ത്യൻ റിലീസായാണ് എത്തിയിരിക്കുന്നത്. ‘ആർഡിഎക്സ്’ന് ശേഷം നഹാസ് ഹിദായത്ത് സംവിധാനം ചെയ്യുന്ന ചിത്രം എന്ന നിലയിലും വേഫെറർ ഫിലിംസിന്റെ വമ്പൻ നിർമ്മാണ സംരംഭമെന്ന നിലയിലും ചിത്രം നേരത്തെ തന്നെ വലിയ പ്രതീക്ഷ ഉയർത്തിയിരുന്നു.

🔥 #ImGame is NOW PLAYING worldwide!

Dulquer Salmaan’s fantasy action thriller opens to strong early audience reactions, with the action, interval block & climax earning praise.

🎬 Directed by Nahas Hidhayath.#DulquerSalmaan #MalayalamCinema pic.twitter.com/4JDufHHhnI

— CinemaCafe™ Media (@cinemacafemedia) September 3, 2026

അണിയറ പ്രവർത്തകർ: ലൈൻ പ്രൊഡ്യൂസർ – ബിബിൻ പെരുമ്പിള്ളി; ഛായാഗ്രഹണം – ജിംഷി ഖാലിദ്; സംഗീതം – ജേക്സ് ബിജോയ്; എഡിറ്റിംഗ് – ചമൻ ചാക്കോ; ആക്ഷൻ – അൻപറിവ് മാസ്റ്റേഴ്സ്; പ്രൊഡക്ഷൻ ഹെഡ് – സുജയ് ജെയിംസ്, ദേവദേവൻ; പ്രൊഡക്ഷൻ ഡിസൈനർ – അജയൻ ചാലിശ്ശേരി; മേക്കപ്പ് – റോണക്സ് സേവ്യർ; കോസ്റ്റ്യൂം – മഷർ ഹംസ; പ്രൊഡക്ഷൻ കൺട്രോളർ – ദീപക് പരമേശ്വരൻ; അസോസിയേറ്റ് ഡയറക്ടർ – രോഹിത് ചന്ദ്രശേഖർ; ഗാനരചന – മനു മഞ്ജിത്ത്, വിനായക് ശശികുമാർ; VFX – തൗഫീഖ്, എഗ്‌വൈറ്റ്; പോസ്റ്റർ ഡിസൈൻ – ടെൻ പോയിന്റ്; സൗണ്ട് ഡിസൈൻ – സിങ്ക് സിനിമ; സൗണ്ട് മിക്സ് – കണ്ണൻ ഗണപത്; സ്റ്റിൽസ് – എസ്.ബി.കെ; മാർക്കറ്റിംഗ് ഹെഡ് – വിജിത് വിശ്വനാഥൻ.