സൂര്യയെ നായകനാക്കി മലയാളി സംവിധായകൻ ജിത്തു മാധവൻ ഒരുക്കുന്ന തമിഴ് ചിത്രം ‘സീനി’ലെ ആദ്യ ഗാനം ‘ആതി ഇവ യാരാ’ പുറത്തിറങ്ങി. ഗാനത്തിന്റെ ലിറിക്കൽ വീഡിയോയാണ് അണിയറപ്രവർത്തകർ പുറത്തുവിട്ടിരിക്കുന്നത്. സുഷിൻ ശ്യാം സംഗീതമൊരുക്കിയ ഗാനത്തിന് വരികളെഴുതിയതും ആലപിച്ചതും രാജ് പ്രിയനാണ്. ചിത്രത്തിലെ ഗാനരംഗത്തിന് നൃത്തസംവിധാനം നിർവഹിച്ചിരിക്കുന്നതും രാജ് പ്രിയൻ തന്നെയാണ്.
‘ലുങ്കി ബോയ്സ്’ എന്ന ചിത്രത്തിലൂടെ ശ്രദ്ധ നേടിയ രാജ് പ്രിയന്റെ സാന്നിധ്യമാണ് പുതിയ ഗാനത്തിന്റെ പ്രധാന ആകർഷണങ്ങളിലൊന്ന്. ചടുലമായ താളവും എന്റർടെയ്ൻമെന്റ് സ്വഭാവവുമുള്ള ഗാനത്തിന്റെ ലിറിക്കൽ വീഡിയോ ചിത്രത്തിന്റെ ആഘോഷമൂഡിലേക്കുള്ള സൂചന നൽകുന്നു. ആദ്യ ഗാനം പുറത്തിറങ്ങിയതോടെ സിനിമയിലെ മറ്റ് ഗാനങ്ങളെക്കുറിച്ചുള്ള പ്രതീക്ഷകളും ഉയരുകയാണ്.
നവംബർ 6ന് ദീപാവലി റിലീസായി ‘സീൻ’ ലോകമെമ്പാടുമുള്ള തിയറ്ററുകളിലെത്തും. കേരളത്തിൽ ഗോകുലം ഗോപാലന്റെ ശ്രീ ഗോകുലം മൂവീസ് ആണ് ചിത്രം പ്രദർശനത്തിനെത്തിക്കുന്നത്. വിപുലമായ റിലീസാണ് കേരളത്തിൽ പദ്ധതിയിടുന്നത്. ഡ്രീം ബിഗ് ഫിലിംസ് ആണ് ചിത്രത്തിന്റെ കേരള ഡിസ്ട്രിബ്യൂഷൻ പാർട്ണർ.
ഴഗരം സ്റ്റുഡിയോസ്, 2D എന്റർടെയ്ൻമെന്റ് സ്റ്റുഡിയോസ് എന്നീ ബാനറുകളിൽ ജ്യോതികയും സൂര്യയും ചേർന്നാണ് ചിത്രം നിർമ്മിക്കുന്നത്. ജയശ്രീ ദാമോദരനാണ് സഹനിർമ്മാതാവ്.
‘രോമാഞ്ചം’, ‘ആവേശം’ എന്നീ ചിത്രങ്ങളിലൂടെ മലയാള സിനിമയിൽ ശ്രദ്ധേയനായ ജിത്തു മാധവന്റെ ആദ്യ തമിഴ് സംവിധാന സംരംഭമാണ് ‘സീൻ’. സൂര്യയുടെ മാസ് അവതരണത്തിനൊപ്പം കോമഡിക്കും ആക്ഷനും പ്രാധാന്യം നൽകുന്ന സ്റ്റൈലിഷ് എന്റർടെയ്‌നറായാണ് ചിത്രം ഒരുങ്ങുന്നത്. ഇമ്പരാജ് ഐപിഎസ് എന്ന പൊലീസ് ഉദ്യോഗസ്ഥനായാണ് സൂര്യ ചിത്രത്തിലെത്തുന്നത്.
നേരത്തെ പുറത്തിറങ്ങിയ ചിത്രത്തിന്റെ ടൈറ്റിൽ ടീസറിന് മികച്ച പ്രതികരണമാണ് ലഭിച്ചതെന്ന് അണിയറപ്രവർത്തകർ അറിയിച്ചിരുന്നു. ആക്ഷൻ രംഗങ്ങളും നർമമുഹൂർത്തങ്ങളും സ്റ്റൈലിഷ് അവതരണവും ഒരുമിക്കുന്ന ചിത്രമായിരിക്കുമെന്ന സൂചനയാണ് ടീസർ നൽകിയത്.
സൂര്യയ്ക്കൊപ്പം മലയാളി താരങ്ങളായ നസ്രിയ നസീമും നസ്ലനും പ്രധാന കഥാപാത്രങ്ങളായി എത്തുന്നു. ആനന്ദ് രാജ്, ലാൽ, രാജ് പ്രിയൻ എന്നിവരും ചിത്രത്തിന്റെ താരനിരയിലുണ്ട്. ‘കറുപ്പ്’, ‘വിശ്വനാഥ് ആൻഡ് സൺസ്’ എന്നീ ചിത്രങ്ങൾക്ക് പിന്നാലെ സൂര്യ നായകനാകുന്ന പുതിയ ചിത്രമെന്ന നിലയിലും ‘സീൻ’ ശ്രദ്ധ നേടുന്നു.
ജിത്തു മാധവൻ–സുഷിൻ ശ്യാം കൂട്ടുകെട്ട് തമിഴിലേക്കെത്തുന്നു എന്നതും ചിത്രത്തിന്റെ പ്രത്യേകതയാണ്. മലയാളത്തിൽ ‘രോമാഞ്ചം’, ‘ആവേശം’ എന്നീ ചിത്രങ്ങളിൽ ഒരുമിച്ച ഇരുവരും ആദ്യമായാണ് ഒരു തമിഴ് സിനിമയ്ക്കായി കൈകോർക്കുന്നത്. സുഷിൻ ശ്യാം സ്വതന്ത്ര സംഗീതസംവിധായകനായി തമിഴിൽ അരങ്ങേറ്റം കുറിക്കുന്ന ചിത്രം കൂടിയാണിത്.
🎶 ‘Aathi Iva Yaara’ is OUT NOW!
The first song from Suriya–Jithu Madhavan’s #Scene is here!
🔥 Music by Sushin Shyam 🎤 Written & sung by Raj Priyan
🎬 Worldwide in theatres November 6.
#Suriya #JithuMadhavan #SushinShyam https://t.co/tzA793qKpg— CinemaCafe™ Media (@cinemacafemedia) October 8, 2026
ചിത്രത്തിന്റെ സംഗീതാവകാശം സോണി മ്യൂസിക് സൗത്ത് സ്വന്തമാക്കിയിട്ടുണ്ട്. നിലവിൽ പോസ്റ്റ് പ്രൊഡക്ഷൻ ജോലികൾ പുരോഗമിക്കുന്ന ‘സീൻ’ നവംബർ 6ന് ആഗോളതലത്തിൽ തിയറ്ററുകളിലെത്തും.
അണിയറ പ്രവർത്തകർ: സംവിധാനം – ജിത്തു മാധവൻ; നിർമ്മാണം – ജ്യോതിക, സൂര്യ; ബാനറുകൾ – ഴഗരം സ്റ്റുഡിയോസ്, 2D എന്റർടെയ്ൻമെന്റ് സ്റ്റുഡിയോസ്; സഹനിർമ്മാണം – ജയശ്രീ ദാമോദരൻ; ഛായാഗ്രഹണം – വിനീത് അഗസ്റ്റ്യൻ; സംഗീതം – സുഷിൻ ശ്യാം; എഡിറ്റിങ് – അജ്മൽ സാബു; ഓഡിയോഗ്രഫി – വിഷ്ണു ഗോവിന്ദ്; പ്രൊഡക്ഷൻ ഡിസൈൻ – അശ്വിനി കാലെ; ആക്ഷൻ – ചേതൻ ഡി’സൂസ; ആർട്ട് ഡയറക്ടർ – എ. രാജേഷ്; കോസ്റ്റ്യൂം ഡിസൈൻ – മഷാർ ഹംസ; മേക്കപ്പ് – റോണക്സ് സേവ്യർ; തമിഴ് സംഭാഷണങ്ങൾ – ഡേവിഡ് സെൽവം; കോ-ഡയറക്ടർ – അരുൺ അപ്പുക്കുട്ടൻ; എക്സിക്യൂട്ടീവ് പ്രൊഡ്യൂസർ – എം.പി. സെന്തിൽ; ചീഫ് എക്സിക്യൂട്ടീവ് ഓഫീസർ – സുഷ്മ കൃഷ്ണമൂർത്തി; പ്രൊഡക്ഷൻ എക്സിക്യൂട്ടീവ് – കെ. ശ്രീധർ രാജ്; സ്റ്റിൽസ് – രോഹിത് കെ. സുരേഷ്; കാസ്റ്റിങ് ഡയറക്ടർ – ഷിഫ്ന ബബിൻ പാക്കർ; VFX – ഹരിഹരസുതൻ; കളറിസ്റ്റ് – രംഗ; ക്രിയേറ്റീവ് പ്രൊഡ്യൂസർ – നവീൻ നഞ്ജുണ്ടൻ; കേരള വിതരണം – ശ്രീ ഗോകുലം മൂവീസ്; കേരള ഡിസ്ട്രിബ്യൂഷൻ പാർട്ണർ – ഡ്രീം ബിഗ് ഫിലിംസ്; ❤️ പി.ആർ.ഒ – ശബരി.
Suriya’s Scene First Song Aathi Iva Yaara Out; Sushin Shyam and Raj Priyan Join Forces
Aathi Iva Yaara, the first song from Suriya and Jithu Madhavan’s Scene, is out now. Composed by Sushin Shyam, the track is written and sung by Raj Priyan. The film releases November 6.
About Author
