ജയസൂര്യ–നൈല ഉഷ ചിത്രം ‘മായൻ’; റഷ്യൻ പശ്ചാത്തലത്തിൽ ഫാന്റസി ത്രില്ലർ, ചിത്രീകരണം പുരോഗമിക്കുന്നു

ജയസൂര്യയ്ക്കും നൈല ഉഷയ്ക്കുമൊപ്പം വിജയ് ബാബു, ഐശ്വര്യ രാജ്, ജിബിൻ ഗോപിനാഥ് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. പുരാതന ആഭിചാര ആചാരങ്ങളുടെയും അദൃശ്യ ശക്തികളുടെയും ആഗോള ശൃംഖലയെ കേന്ദ്രീകരിക്കുന്ന ചിത്രം റഷ്യൻ പശ്ചാത്തലത്തിലാണ് കഥ പറയുന്നത്.

ത്രില്ലർ സ്വഭാവത്തിൽ മാത്രം ഒതുങ്ങാതെ ഫാന്റസിയും മിസ്റ്ററിയും ഉൾപ്പെടെയുള്ള ഘടകങ്ങൾ സമന്വയിപ്പിച്ചാണ് ചിത്രത്തിന്റെ കഥാലോകം ഒരുക്കുന്നതെന്നാണ് അണിയറപ്രവർത്തകർ നൽകുന്ന സൂചന. അന്താരാഷ്ട്ര സ്വഭാവമുള്ള ദൃശ്യപരിചരണത്തോടെയാണ് സിനിമ ഒരുക്കുന്നത്.

ചിത്രത്തിന്റെ പ്രഖ്യാപനം മുതൽ ലൊക്കേഷനിലെ ഓണാഘോഷം വരെയുള്ള വിവിധ അപ്ഡേറ്റുകൾ ഇതിനോടകം അണിയറപ്രവർത്തകർ പുറത്തുവിട്ടിട്ടുണ്ട്. സിനിമയുടെ പ്രമേയവുമായി ബന്ധപ്പെട്ട സൂചനകളും സമൂഹമാധ്യമങ്ങളിൽ ചർച്ചയാകുന്നുണ്ട്. മലയാള സാഹിത്യത്തിലുൾപ്പെടെ പരാമർശിക്കപ്പെട്ടിട്ടുള്ള ‘കറുത്തച്ചനൂട്ട്’ പോലുള്ള നിഗൂഢ വിഷയങ്ങളും സിനിമയുടെ കഥാലോകത്തിന്റെ ഭാഗമാകുമെന്ന സൂചനയാണ് പുറത്തുവരുന്നത്. ഇത് ‘മായൻ’ എന്തായിരിക്കും അവതരിപ്പിക്കുക എന്നതിലുള്ള പ്രേക്ഷകരുടെ കൗതുകം വർധിപ്പിക്കുന്നു.

മലയാളത്തിലെ ശ്രദ്ധേയ തിരക്കഥാകൃത്ത് റാഫിയും സംവിധായകൻ ജിതിൻ കെ. ജോസും ചേർന്നാണ് ചിത്രത്തിന്റെ കഥ, തിരക്കഥ, സംഭാഷണം എന്നിവ ഒരുക്കിയിരിക്കുന്നത്. ഫൈസൽ അലി ഛായാഗ്രഹണം നിർവഹിക്കുമ്പോൾ പ്രവീൺ പ്രഭാകറാണ് ചിത്രസംയോജനം കൈകാര്യം ചെയ്യുന്നത്. മുജീബ് മജീദ് സംഗീതവും പശ്ചാത്തല സംഗീതവും ഒരുക്കുന്നു.

വലിയ കാൻവാസും റഷ്യൻ പശ്ചാത്തലവും ആഭിചാര-ഫാന്റസി ഘടകങ്ങളും അദൃശ്യ ശക്തികളെ ചുറ്റിപ്പറ്റിയുള്ള കഥയുമാണ് ‘മായനെ’ ശ്രദ്ധേയമാക്കുന്നത്. ചിത്രീകരണം പുരോഗമിക്കുന്നതിനൊപ്പം സിനിമയെക്കുറിച്ചുള്ള കൂടുതൽ വിവരങ്ങൾ വരും ദിവസങ്ങളിൽ പുറത്തുവരുമെന്നാണ് പ്രതീക്ഷ.

🔥 Jayasurya & Nyla Usha team up for #Mayan!

Directed by Jithin K Jose, the fantasy-mystery thriller explores ancient occult rituals and supernatural forces against a Russian backdrop. Filming is currently underway.#Jayasurya #NylaUsha #MalayalamCinema pic.twitter.com/mbLfx9k520

— CinemaCafe™ Media (@cinemacafemedia) August 30, 2026

അണിയറ പ്രവർത്തകർ: സംവിധാനം – ജിതിൻ കെ. ജോസ്; നിർമ്മാണം – രാജീവ് ഗോവിന്ദൻ; ബാനർ – മാജിക് മൂൺ പ്രൊഡക്ഷൻസ്; കഥ, തിരക്കഥ, സംഭാഷണം – റാഫി, ജിതിൻ കെ. ജോസ്; ഛായാഗ്രഹണം – ഫൈസൽ അലി; ചിത്രസംയോജനം – പ്രവീൺ പ്രഭാകർ; സംഗീതം, പശ്ചാത്തല സംഗീതം – മുജീബ് മജീദ്; പ്രൊഡക്ഷൻ ഡിസൈനർ – സുനിൽ ദാസ്; എക്സിക്യൂട്ടീവ് പ്രൊഡ്യൂസർ – സുനിൽ സിംഗ്; ലൈൻ പ്രൊഡ്യൂസർ – രോഹിത് ആർ. നായർ; പ്രൊഡക്ഷൻ കൺട്രോളർ – ദീപക് പരമേശ്വരൻ; ചീഫ് അസോസിയേറ്റ് ഡയറക്ടർ – ബോസ് വി.; പി.ആർ.ഒ & ഡിജിറ്റൽ മാർക്കറ്റിംഗ് – വിപിൻ കുമാർ വി.; സ്റ്റിൽസ് – സിനത് സേവ്യർ; ഡിസൈൻസ് – ആന്റണി സ്റ്റീഫൻ.