ഓണം ആഘോഷമാക്കി ‘ഖലീഫ’; മാസ് ആക്ഷൻ ഫാമിലി എന്റർടെയ്നറിന് മികച്ച പ്രതികരണം, രണ്ടാം ഭാഗം ‘ഖലീഫ ദി ലെഗസി’ പ്രഖ്യാപിച്ചു

പൃഥ്വിരാജിന്റെ മാസ് അവതരണവും സ്റ്റൈലിഷ് ആക്ഷൻ രംഗങ്ങളും ചിത്രത്തിന്റെ പ്രധാന ആകർഷണങ്ങളാണ്. ജേക്സ് ബിജോയിയുടെ പശ്ചാത്തല സംഗീതം ആക്ഷൻ രംഗങ്ങൾക്ക് കൂടുതൽ തീവ്രത നൽകുമ്പോൾ, സംവിധായകൻ വൈശാഖിന്റെ ട്രേഡ്മാർക്ക് മാസ് മേക്കിങ്ങും ചിത്രത്തിന് കരുത്താകുന്നു. പൃഥ്വിരാജിന്റെ വ്യത്യസ്തമായ ലുക്കിനൊപ്പം മോഹൻലാലിന്റെ അതിഥി വേഷവും തിയറ്ററുകളിൽ വലിയ ആവേശമാണ് സൃഷ്ടിക്കുന്നത്. കഥയിൽ അപ്രതീക്ഷിതമായി കടന്നുവരുന്ന മറ്റു ചില കഥാപാത്രങ്ങളും പ്രേക്ഷകർക്ക് സർപ്രൈസ് നൽകുന്നു.

കുടുംബ പ്രേക്ഷകരെയും യുവാക്കളെയും ഒരുപോലെ ലക്ഷ്യമിട്ടാണ് ‘ഖലീഫ’യുടെ കഥയും അവതരണവും ഒരുക്കിയിരിക്കുന്നത്. ആക്ഷൻ, കുടുംബബന്ധങ്ങൾ, പ്രതികാരം, സൗഹൃദം, വഞ്ചന എന്നിവയെല്ലാം ചേർന്ന പാക്കേജാണ് ചിത്രം. ജോമോൻ ടി. ജോണിന്റെ ഛായാഗ്രഹണവും ചമൻ ചാക്കോയുടെ എഡിറ്റിങ്ങും സിനിമയുടെ വേഗതയ്ക്കും ദൃശ്യഭംഗിക്കും കൂടുതൽ കരുത്തേകുന്നു.

അമീർ അലിയുടെ അടുത്ത സുഹൃത്തായ സമദിനെ കേന്ദ്രീകരിച്ചാണ് കഥയുടെ തുടക്കം. സഹോദരിയുടെ വിവാഹത്തിന് തൊട്ടടുത്ത ദിവസം സമദിനെ അമീർ അലി കസ്റ്റംസിന് ഒറ്റിക്കൊടുക്കുന്നതോടെയാണ് സംഭവങ്ങൾക്ക് തുടക്കമാകുന്നത്. കസ്റ്റംസ് കസ്റ്റഡിയിലാകുന്ന സമദിലൂടെ അമീർ അലിയുടെ ഭൂതകാലവും കുടുംബചരിത്രവും പ്രേക്ഷകർക്ക് മുന്നിൽ തുറക്കപ്പെടുന്നു.

സ്വർണക്കള്ളക്കടത്തിന്റെ ചരിത്രവുമായി ബന്ധമുള്ള മാമ്പറത്ത് അഹമ്മദ് അലിയുടെ പിൻതലമുറയുടെ കഥയാണ് പിന്നീട് ചിത്രം വികസിപ്പിക്കുന്നത്. പതിനാറാം വയസ്സിൽ പിതാവിനെ അവസാനമായി കണ്ട അഹമ്മദ് അലിയുടെ മകൻ, ജീവിതത്തിൽ ഒരിക്കലും സ്വർണക്കടത്തിന്റെ വഴിയിലേക്ക് പോകില്ലെന്ന തീരുമാനത്തിലാണ് മുന്നോട്ടുപോകുന്നത്. എന്നാൽ താൻ ചെയ്യാത്ത കുറ്റത്തിന്റെ പേരിൽ ശിക്ഷിക്കപ്പെടുന്നതോടെ അയാളുടെ ജീവിതം മാറിമറിയുന്നു. നഷ്ടപ്പെട്ട ജീവിതം തിരിച്ചുപിടിക്കാനുള്ള ശ്രമം ഒടുവിൽ അയാളെ വീണ്ടും സ്വർണക്കടത്തിന്റെ അപകടകരമായ ലോകത്തിലേക്ക് എത്തിക്കുന്നു.

ഈ കുടുംബചരിത്രത്തിന്റെ തുടർച്ചയിലാണ് മാമ്പറത്ത് ആമിർ അലി എന്ന പൃഥ്വിരാജ് കഥാപാത്രത്തിന്റെ പോരാട്ടം വികസിക്കുന്നത്. കുടുംബത്തിനുവേണ്ടി രംഗത്തിറങ്ങുന്ന ആമിർ അലി തനിക്കെതിരായ കണക്കുകൾ ഓരോന്നായി എങ്ങനെ തീർക്കുന്നു എന്നതാണ് ചിത്രത്തിന്റെ പ്രധാന കഥാതന്തു.

ആദ്യ ഭാഗത്തിന്റെ കഥയ്ക്കൊപ്പം തന്നെ രണ്ടാം ഭാഗത്തെക്കുറിച്ചുള്ള കൗതുകവും ചിത്രം അവശേഷിപ്പിക്കുന്നു. ‘ഖലീഫ ദി ലെഗസി’ എന്ന പേരിൽ രണ്ടാം ഭാഗം പ്രഖ്യാപിച്ചതോടെ അതിന്റെ കഥ എന്തായിരിക്കും, ആദ്യ ചിത്രത്തിലെ ഏതൊക്കെ കഥാപാത്രങ്ങൾ തിരിച്ചെത്തും തുടങ്ങിയ ചർച്ചകളും സോഷ്യൽ മീഡിയയിൽ സജീവമായിട്ടുണ്ട്.

ജിനു ഇന്നോവേഷൻസിന്റെ ബാനറിൽ ഒരുക്കിയ ചിത്രത്തിന്റെ തിരക്കഥയും നിർമ്മാണവും ജിനു എബ്രഹാമാണ് നിർവഹിച്ചിരിക്കുന്നത്. സൂരജ് കുമാർ, ശ്രീലാൽ സൂരപാണി, സിജോ സെബാസ്റ്റ്യൻ എന്നിവരാണ് സഹനിർമ്മാതാക്കൾ.

പൃഥ്വിരാജിനൊപ്പം മാളവിക ശർമ്മ, നീൽ നിതിൻ മുകേഷ്, രഞ്ജി പണിക്കർ, സഞ്ജു ശിവറാം, ശിവജിത്, ഇന്ദ്രൻസ്, ഷമ്മി തിലകൻ, ഷൈൻ വർഗീസ്, ആനന്ദ് മന്മഥൻ, ഡോൺ മൈക്കിൾ, മോഹിനി, കൈറാ, മാസ്റ്റർ നഫാഷ് തുടങ്ങിയവരും പ്രധാന വേഷങ്ങളിലെത്തുന്നു. ട്രെയ്‌ലർ പുറത്തിറങ്ങിയതുമുതൽ മോഹൻലാലിന്റെ സാന്നിധ്യം സംബന്ധിച്ച് ആരാധകർക്കിടയിൽ വലിയ ചർച്ചയുണ്ടായിരുന്നു. മാമ്പറയ്ക്കൽ അഹമ്മദ് അലി എന്ന കഥാപാത്രമായുള്ള മോഹൻലാലിന്റെ അതിഥി വേഷം സിനിമയിലെ പ്രധാന സർപ്രൈസുകളിലൊന്നായി മാറുന്നു.

🔥 Onam turns into a mass celebration with #Khalifa!#PrithvirajSukumaran’s mass avatar, stylish action and #JakesBejoy’s electrifying score are winning audiences. pic.twitter.com/m7T1kmBH50

— CinemaCafe™ Media (@cinemacafemedia) August 25, 2026

അണിയറ പ്രവർത്തകർ: ഛായാഗ്രഹണം – ജോമോൻ ടി. ജോൺ, സംഗീതം – ജേക്സ് ബിജോയ്, എഡിറ്റിംഗ് – ചമൻ ചാക്കോ, പ്രൊഡക്ഷൻ ഡിസൈൻ – മോഹൻദാസ്, ആക്ഷൻ – യാനിക്ക് ബെൻ, ഫീനിക്സ് പ്രഭു, ചേതൻ ഡിസൂസ, കോ-ഡയറക്ടർ – സുരേഷ് ദിവാകർ, എക്സിക്യൂട്ടീവ് പ്രൊഡ്യൂസർ – ഷൈൻ വർഗീസ്, കോസ്റ്റ്യൂംസ് – മഷർ ഹംസ, കലാസംവിധാനം – വിശ്വനാഥ് അരവിന്ദ്, മേക്കപ്പ് – അമൽ ചന്ദ്രൻ, സൗണ്ട് ഡിസൈൻ – സിങ്ക് സിനിമ, അഡീഷണൽ മ്യൂസിക് – ജാബിർ സുലൈം, ഫൈനൽ മിക്സ് – എം.ആർ. രാജാകൃഷ്ണൻ, പ്രൊഡക്ഷൻ കൺട്രോളർമാർ – റെനി ദിവാകർ, വിനോഷ് കൈമൾ, കളറിസ്റ്റ് – ശ്രീക്ക് വാര്യർ, പോസ്റ്റർ ഡിസൈൻ – എയ്സ്തെറ്റിക്ക് കുഞ്ഞമ്മ, ഡി.ഐ – കളർ പ്ലാനറ്റ്, VFX – പ്രശാന്ത് നായർ (3DS), പ്രമോഷൻസ് ആൻഡ് മാർക്കറ്റിങ് – വിപിൻ കുമാർ പൊഫാറ്റിയോ, സ്റ്റിൽസ് – സിനത് സേവ്യർ.